martes, 24 de abril de 2018

UN ALTO NO CAMIÑO

Iso foi o que lle fixemos esta mañá a uns peregrinos moi peculiares: Ginés, Marina e Komotú. Ginés é un home que decidiu facer o Camiño ata Fisterra desde Santurce (Biscaia) dunha maneira diferente ao que estamos acostumadas a ver, e para iso elixiu a compañía dunha burra chamada Marina e dun canciño co simpático nome de Komotú.
Coñecedores da súa localización, o profesorado decidiu que era un bo momento para entrevistalos e saudalos ao seu paso pola estrada, e así fixemos. Eu esperei un ratiño, porque con tanto animal, tiña algo de medo a que a burra ou o can se asustaran ao ver unha porquiña no medio de tantos pequenos e pequenas. Pero non se asustaron nadiña, nen cos vosos agarimos nen coas vosas preguntas!!!
https://photos.app.goo.gl/md9zQk1z5BNFYXYp2

Xunto con eles viaxaba tamén Yosu, outro home que atopou a Ginés durante o seu percorrido e que, casualidades da vida, tamén facía o Camiño de Santiago desde Santurce!!! 
Con todos eles pasamos un ratiño, desfrutando das historias que nos contaron e mesmo se prestaron a ser gravados para "Radio Rosiña", así que en breve poderedes escoitar a entrevista que improvisaron nun tempo récord o grupo de 5º e 6º.  
Premendo na imaxe podedes ver o resto das fotos.

CELEBRAMOS O DÍA DO LIBRO 2018 CON CELTIA, UNHA CONTADORA DE LIBROS SORPRENDENTES

Un gustazo que esta mañá nos visitara Celtia Figueiras, unha contadora marabillosa que nos fixo pasar unha "hora de ler" moi especial. Ademais, xusto un día despois de celebrar o Día do Libro cos apadriñamentos lectores!!!
 
Celtia conseguiu, a través da súa voz, levarnos de viaxe por lugares sorprendentes a través dos seus libros, os "libros titiriteiros". Uns libros moi especiais, xa que eran enooooormes, pesaaaados e agochaban personaxes moi interesantes. O primeiro, un caracoliño ao que lle fallaba un
pouquiño a súa memoria; o segundo amosou unhas caras máxicas que parecían reais, e tiñan tantas ganas de contar que se non é por Celtia aínda estariamos agora escoitándoos; o terceiro trouxo o mar ata San Cosme, onde descubrimos a aventura dun barco pirata e a súa tripulación...

Premendo AQUÍ podedes ver as fotos desta entretida e divertida actividade.



Moitas grazas a Narciso (Consorcio Editorial), por este agasallo. E tamén a Celtia, por suposto, moitísimas grazas por facernos pasar un rato tan divertido ao compartir connosco estas historias!!!! Agardamos que nos visites en máis ocasións!!!

Se premedes sobre a imaxe inferior, podedes visitar o blog desta marabillosa contadora de historias:
https://celtiafigueiras.blogspot.com.es/

luns, 23 de abril de 2018

CELEBRAMOS O DÍA DO LIBRO 2018 COS APADRIÑAMENTOS E AMADRIÑAMENTOS LECTORES

https://photos.app.goo.gl/UT7n6gZlrgfcIbpv1
Hoxe pasamos unha tarde estupenda celebrando o Día do Libro cunha das actividades que máis nos gustan: os apadriñamentos/amadriñamentos lectores!!!
Encantoume ver a emoción coa que fostes ocupando os diferentes recunchos do cole para ler aos vosos afillados/as os contiños que elixistes en conxunto. E os debuxos que sobre eles fixestes serían a envexa de calquera ilustrador: fantásticos!!!

Ademais, no corredor do cole colocouse un cartel que fostes cubrindo coas vosas "Razóns para ler", e quedou tamén moi fermoso... Son moitos os motivos polos que lemos, algunhas das cales recolle o libro "101 razones para leer" que temos na biblioteca. Pero cada un/unha de vós ten tamén outras moi interesantes e orixinais. Eu tan só quero animarvos a que non deixedes de facelo, porque como di o lema do noso proxecto este curso, "o mundo é máis lindo LENDO".

Podedes ver as fotos desta tarde premendo na foto ou AQUÍ.

E en canto remate de fotografar todas as vosas ilustracións tamén as enlazarei no blog para que poidades ver as viaxes que fixeron as distintas parellas de padriños e madriñas cos seus afillados/as. 
Unha aperta,

DÍPTICO DA CONSELLERÍA PARA CELEBRAR O DÍA DO LIBRO

Bos días!!!!
Hoxe é o DÍA DO LIBRO!!! Xa temos todo preparado para celebralo esta tardiña, non? Seguro que todos os padriños e madriñas están ansiosos/as por contar as historias elixidas para os seus afillados/as... Pasarémolo xenial, de iso estou totalmente segura!!!
Aquí vos deixo o Díptico que cada ano elabora a Consellería para conmemorar esta data. Nesta ocasión, o escritor encargado de escribir o texto foi Fran Alonso. É importante que o leades cos vosos mestres e mestras, pola ironía que o caracteriza; así comprenderédelo moito mellor!!!

Un saúdo e FELIZ DÍA DO LIBRO!!!!!




venres, 20 de abril de 2018

COÑECENDO A NOSA CONTORNA

https://photos.app.goo.gl/1WGWReafTj5ekovI2
Incrible que ata onte non coñecera algúns dos tesouros que agocha o noso concello... E mirade que me gusta camiñar para aquí e para alá, pero descoñecía por completo que aquí en Mazaricos tiñamos riquezas coma as que onte nos amosou Nina na nosa excursión polos arredores.
A primeira parada fixémola no Monte Aro, que nos regalou unha das vistas máis fermosas do lugar: montes e vales divísanse dende o lugar no que se asentou un dos castros máis importantes, e iso que o día non estivo especialmente despexado para poder apreciar incluso o mar, aínda que si puidemos ver como se asomaba un pouquiño un dos montes máis máxicos do mundo: o monte Pindo!
Despois, baixamos ata Pedras Miúdas onde, por primeira vez nas nosas vidas, merendamos ao carón dunha mámoa!!!
Por último, achegámonos a Ponte Olveira, onde o río Xallas divide os concellos de Mazaricos e Dumbría. Esta ponte, ademais, foi testemuña dunha das batallas máis heroicas na nosa historia: a loita dos veciños de toda a contorna contra o exército napoleónico durante a Guerra da Independencia (1809). Foi tamén aquí onde se orixinou, a ámbalas beiras do río)  a feira que posteriormente se trasladaría ata A Picota, onde segue a celebrarse na actualidade.
E aprendemos moitas máis cousas, ademais de coñecer parte do Camiño de Santiago a Fisterra por Mazaricos e ver algúns dos lugares nos que vivides algúns dos nenos e nenas do cole, mentras cruzabamos un mar de herba que enchía os nosos ollos de infinitos tons verdes... Ai, que mañá tan fermosa!!!!
Premede sobre a imaxe ou AQUÍ para ver as fotos e presumir das cousas tan fermosas que tedes, para VALORALAS, RESPECTALAS e COIDALAS!!!

xoves, 19 de abril de 2018

DÍA DO LIBRO 2018

O pasado 2 de abril foi o Día Internacional do Libro Infantil, data de nacemento do escritor Hans Christian Andersen.
Cada ano encárgase un país de elaborar o cartel e redactar un texto para celebrar esta data. Nesta ocasión correspondeulle a Letonia. A imaxe é do ilustrador Reinis Petersons, e o texto da poeta, editora e activista da promoción da lectura Inese Zandere, que titulou "Os libros fan grande o máis pequeno". A Asociación Galega do Libro Infantil e Xuvenil (Galix), traduciuno ao galego, así que tamén eu quero compartilo con todas/os vós. Podedes lelo premendo AQUÍ.

E o luns 23 de abril celebramos o Día do Libro, e premendo nos seguintes enlaces atoparedes interesantes actividades:
-Roberto Andrés Pacini Sarli recolle apuntes interesantes sobre esta data (por que se celebra o 23 de abril, a revolución do libro, e propón un conto ao que terás que escribirlle o seu final).
-Na web Lapicero Mágico propoñen 50 actividades para o Día do Libro.
-Na web Actiludis recolleron adiviñas e crebacabezas para os cursos de 1º a 4º de Primaria.
- "Un conto que contaba o mundo enteiro" en diferentes idiomas (tamén en galego).
-Na web Tiching.com destacarei, entre as moitísimas propostas, a Curtametraxe "Leer en corto", porque nada mellor que un libro para viaxar!!! 

A vindeira semana agárdannos moitas actividades no cole, porque xa sabedes que eu son unha auténtica devoradora de libros, así que estou desexando celebralo convosco!!!
Apertas,                                                                                                                                   
   

martes, 17 de abril de 2018

CHARLA CON NINA SOBRE ARQUEOLOXÍA

https://photos.app.goo.gl/NNP6SqALphlxu75T2
Esta mañá visitou a nosa biblioteca Nina, que nos veu falar de temas relacionados coa visita que faremos o próximo xoves. A arqueóloga do concello proxectou un vídeo sobre o megalitismo, que é a época máis antiga da que falamos, da coincidencia no tempo da época romana e os castros, e da catedral de Santiago como a representación arquitectónica máis salientable da época medieval
O xoves, tendo todo isto en conta, visitaremos o castro de Monte Aro, a necrópole de Pedras Miúdas e Ponte Olveira

ESTADES PREPARADAS/OS?

(Premendo sobre a imaxe podes ver as fotos)

luns, 16 de abril de 2018

DOUS VÍDEOS PARA A CHARLA SOBRE ARQUEOLOXÍA

Mañá recibimos no cole a Nina, a arqueóloga do noso concello. Esta é a segunda ocasión na que nos visita, e antes de que nos reunamos con ela vimos un vídeo que fala sobre os castros, para comprender mellor todos os conceptos dos que nos fale mañá. Déixovolo aquí por se queredes velo de novo:


E tamén nos propuxo ter en conta estoutro vídeo, xa que fala dun dos restos arqueolóxicos que máis abundan na nosa contorna: os dolmens ou antas. Estes monumentos pertencen ao período da historia denominado megalitismo, termo que procede das palabras gregas mega (grande) e lithos (pedra). Seguro que aprendedes moito a través del:






sábado, 14 de abril de 2018

EXCURSIÓN Á CORUÑA

https://photos.app.goo.gl/v3atkn5J9TFGFiSU2 

O martes foron de excursión as rapaciñas e rapaciños de 3º a 6º de Primaria. E este venres tocoulles aos de Infantil e 1º e 2º de Primaria!!! O destino foi outro, e as actividades que realizaron tamén, por iso vos quero contar o que fixeron na cidade herculina.
Na súa viaxe á Coruña puideron desfrutar do concerto didáctico "Pequeno Circo Ambulante". Foi un espectáculo moi divertido onde atoparon pallasos, malabaristas..., á vez que desfrutaron moito da música de circo. 
Fíxolles especial ilusicón que Aroa saíse a facer de equilibrista, Xavi a bailar e Ainhoa a ensinar as súas brillantes botas. 
Despois visitaron a estación de tren de A Coruña e descubriron que é moito máis grande que a de Santiago. Ata viron saír algúns trens. 
Por último, divertíronse moito xogando nun parque do centro da cidade que non coñecían.
Seguro que estades desexando ver as fotos e vídeos desta estupenda xornada. Só tedes  que premer AQUÍ (ou sobre a imaxe).

 

venres, 13 de abril de 2018

RECIBIMOS A JAVIER EN "RADIO ROSIÑA"

https://photos.app.goo.gl/Rtt5lldnrb5JvUP13
Agora si que non hai marcha atrás, rapaciños e rapaciñas!!! "Radio Rosiña" xa está inaugurada por todas e todos vós!!! Aínda que desde que recibimos e colocamos todo o equipamento necesario xa fostes moitas as persoas que por ela pasastes, onte foi un día moi especial, xa que recibimos a visita dun auténtico profesional: Javier Prado. Javier pasou con nós toda a mañá, dándonos moitos consellos para aproveitar ao máximo posible este medio de comunicación que nos enche de ilusión, explicándonos como se manexan a mesa de mezclas e o programa de gravación, como controlar os micrófonos e mesmo descubrimos como podemos incluír música para as sintonías dos nosos programas!!! Tivestes a oportunidade de gravar as primeiras entrevistas, narrar un conto, deseñar un programa para convencer ás oíntes de que o noso é o mellor cole do mundo, etc.
Para a vindeira semana xa vos contaremos como tedes que facer para descargar os podcast que vaiamos gravando, pero ata entón, aquí vos deixo as fotos que fixemos durante esta xornada radiofónica na que queremos agradecer a Javier o esforzo por viaxar ata San Cosme e o seu entusiasmo e paciencia para explicarnos o funcionamento da radio. Javier, foi todo un pracer coñecerte. MOITÍSIMAS GRAZAS!!!
(Para ver as fotos, premede sobre a imaxe ou AQUÍ)




mércores, 11 de abril de 2018

ENQUISAS NO CAMIÑO DE SANTIAGO

Como ben sabedes, o Camiño de Santiago a Fisterra pasa polo concello de Mazaricos. E na parroquia de Santa Mariña hai dous albergues moi ligados ao noso centro, xa que pertencen a dúas familias que aquí teñen escolarizadas ás súas rapaciñas: Paula e Carla. Foi este o motivo polo que, unido ao Proxecto Documental sobre o turismo que propuxemos desde a Biblioteca, así como o Plan Proxecta no que tamén estamos inscritos, o que nos motivou a elaborar unhas enquisas para que cubriran todas as persoas que fan o Camiño ata o fin da terra. Entregámolas antes da Semana Santa e xa temos unha grande parte delas cubertas. Todo isto foi posible grazas á colaboración das mencionadas familias e aos peregrinos que, desinteresadamente, adicaron un ratiño do seu tempo a cubrilas. A todas elas, MOITÍSIMAS GRAZAS!!!

Se queredes saber as preguntas que lles fixemos, aquí vos deixamos a que está en galego:



Pero tamén as fixemos noutros idiomas, xa que as persoas que fan o Camiño veñen de lugares moi diferentes. Premendo sobre os diferentes idiomas, podedes lelas en castelán, en inglés e tamén en francés.



EXCURSIÓN A SANTIAGO DE COMPOSTELA

Este martes foi un día atípico no noso cole, xa que os grupos de 3º a 6º foron de excursión a Santiago, e o centro quedou coas rapaciñas de Infantil, 1º e 2º, e os mestres Patricia, Óscar e David. A saber o que farían mentras estabamos de viaxe... Pero eu vouvos contar o ben que o pasamos na capital galega. A primeira parada fixémola na Praza do Toural, onde visitamos a Fundación Eugenio Granell. A través dunha visita guiada puidemos coñecer un pouquiño máis a obra deste destacado pintor surrealista. Ademais, este artista galego viaxou e viviu en moitos outros lugares (Madrid, República Dominicana, Guatemala, Puerto Rico e Nova York entre eles), o que influíu moito na súa obra. E non só na pictórica, xa que entre os óleos tamén descubrimos algunhas esculturas, debuxos, colaxes e mesmo obxectos persoais do artista.
Ademais, tivemos a oportunidade de pisar unha das terrazas máis espectaculares do casco histórico de Compostela, xa que o museo atópase no Pazo de Bendaña, que ademais de ser un edificio fermosísimo, amosa unha vista pouco coñecida da cidade. 
Despois camiñamos ata o Teatro Principal para asistir ao espectáculo de danza "Emoticores", interpretado por "Las Tricotouses", onde as emocións toman forma a través das cores e o movemento, unido ao son e ás proxeccións audiovisuais.
Ao rematar, subimos camiñando ata a Praza de Abastos, onde aínda tivemos tempo para visitar algúns dos seus postos (carnizarías, peixarías, panadarías e froitarías), nalgúns dos cales nos detivemos para facer preguntas sobre aquelo que máis nos chamou a atención ou para escoitar aos vendedores que, amablemente, nos contaron cousas moi interesantes. 
Desde logo, pasámolo pipa!!!!! Podedes comprobalo vendo as fotos que fixemos se premedes AQUÍ.

E se queres aprender máis sobre a Fundación Eugenio Granell, premendo sobre a imaxe podes visitar a súa páxina web.

http://www.fundacion-granell.org/actualidad/index.php


venres, 23 de marzo de 2018

A SEMANA DA PRENSA

Dende o ano 1989, moitos centros educativos galegos veñen celebrando a "Semana da Prensa". A edición deste ano é xa a número 30, e no calendario aparece sinalada entre os días 5 e 9 de marzo. No noso cole estivemos analizando as noticias, e quixen tamén darvos algúns consellos para que, á hora de ler as noticias que aparecen nas diferentes páxinas de Internet, non vos traten de enganar: "COMO DETECTAR NOTICIAS FALSAS EN INTERNET" é un vídeo elaborado polo Equipo de Biblioteca para que vos fixedes moito en todo aquelo que aparece nese inabarcable mundo. Aquí volo deixo, esperando que vos sexa de gran utilidade:




xoves, 22 de marzo de 2018

COMEZAMOS A PLANTAR NO INVERNADOIRO

Esta última semana de marzo no cole comezamos a plantación no invernadoiro. Despois da grande axuda do noso conserxe José e o papá de Mateo, Luís, quenes se encargaron de preparar a terra e colocar a tea que iremos cubrindo coas diferentes plantas, esta xornada adicaron un ratiño algúns dos grupos do cole. O primeiro en facelo foi o grupo de Infantil que inauguraron o horto plantando amorodeiras. Ademais de colocar na terra as súas plantiñas, tamén tiveron tempo de observar os caracois, a auga, e tamén enlarafuzarse un pouco coa terra!!! 
Despois foron as nenas e nenos de 3º e 4º, que plantaron leitugas, porros e cebolo. E, por último, 5º e 6º, a quenes lles tocou rematar a faena: brócoli, coliflor e repolo. Á volta das vacacións veremos como foron medrando todas estas plantiñas, ademais de ver as fotos dunha xornada marcada por esta actividade tan necesaria como produtiva.
Quedaron as nenas e nenos de 1º e 2º, polo que serán os primeiros na segunda volta, que terá lugar ao regreso das vacacións! Preparádevos, eh?

Unha aperta!!! 


PRESENTACIÓN DE "RADIO ROSIÑA"

Este mes escribínvos en varias ocasións, todas elas chea de ledicia por poder compartir con vós un montón de novidades, pero esta é moi especial!!!! A radio do cole xa ten nome: RADIO ROSIÑA!!! Que ilusión me fai que leve o meu nome!!! E como todas as marcas coñecidas van asociadas a unha imaxe, esta semana deixeivos nas vosas clases unha carta animándovos a participar no deseño do logotipo que levará a nosa radio. Seguro que todas e todos me sorprendedes coas vosas propostas!!! Ánimo, que xa está todo preparado para que poidades escoitar e descargar as diferentes gravacións que fomos facendo nos diferentes programas!!!
Podedes ler de novo a carta:



Unha aperta enorme!!!!


mércores, 21 de marzo de 2018

EXCURSIÓN A SANTIAGO E VIAXE EN TREN A PADRÓN

Este mércores cumpriuse un dos maiores desexos de moitas nenas e nenos do cole: VIAXAR EN TREN!!! A verdade é que foi un momento espectacular, cheo de emoción; unha auténtica FESTA!!!
Pero antes de subir ao tren, estivemos na cidade compostelá aproveitando algunhas das moitas ofertas culturais coas que a capital galega adoita satisfacernos. 
O grupo de Infantil visitou o CGAC, onde descubriron obras feitas de distintos materiais: metal, pintura, auga, madeira, parafusos e mesmo fondant e nubes de azucre. Coa axuda de Natalia metéronse dentro dos cadros e imaxinaron o estado de ánimo do artista cando creou as obras. Tamén fixeron un obradoiro no que, como artistas que son, completaron algunhas fotos de diferentes sitios do mundo.
Despois visitaron o Museo do Pobo Galego, onde coñeceron algunhas cousas relacionadas cos barcos, a pesca, a música tradicional, os cestos... E tamén viron e andiveron pola súa escaleira helicoidal. Toda unha experiencia!!!

Os grupos de Primaria chegaron directos á Sede Afundación, para ver a mostra "A arte no cómic", que recolle reinterpretacións dalgunhas obras da historia da arte a través de diferentes artistas adicados ao cómic. Coa axuda de Vanesa, observamos obras da colección dos Museos do Louvre (París), do Prado e do Thyssen-Bornemisza (Madrid), deténdonos sobre todo en obras de Dalí e na Gioconda. Pero tamén puidemos ver a historieta "Pikiblinder", encargada a Jacobo Fernández por Afundación para esta mostra. E é que tamén na novena arte os autores galegos están presentes: Brais Rodríguez, Miguelanxo Prado, Alfonso Barreiro, etc. Todos estes autores de bandas deseñadas utilizaron os seus recursos para amosarnos o mundo da pintura dun modo distinto ao habitual. E así, no medio das historietas van aparecendo obras de Maruja Mallo, Castelao, Paco Leiro, Laxeiro, Urbano Lugrís ou Julia Minguillón, entre moitos/as outros/as. 
Tamén crearon o seu propio "Pikiblinder", que expoñeremos no cole en canto rematen!!!
Despois foron directos para o Teatro Principal, onde asistiron á representación teatral "O conto de Azuzaina". Azuzaina é unha imprenta na que os seus operarios reciben un encargo urxente: o libro das familias. A través de divertidas estratexias, nas que integran música, malabares, imaxes, etc., completan o traballo a tempo e amósannos diferentes tipos de familia cunha mensaxe de respecto e tolerancia hacia todos eles.

Pero, sen dúbida, o momentazo do día foi a chegada á estación de tren!!! Unha vez observaron o vestíbulo (taquillas, indicadores de horarios, reloxos, etc.), situáronse na plataforma indicada para subir no tren que fai o percorrido A Coruña-Vigo. Santiago é unha das súas paradas, e foi aquí onde ocuparon un par de vagóns para montar todos os rapaciños e rapaciñas, ademais dos mestres que os acompañaron. Tiñades que ver a que montaron na estación!!! As caras de alegría e a ilusión eran tales que contaxiaron a todos os viaxeiros que alí se atopaban, pero tamén aos operarios de Renfe, que incluso axudaron a subir aos máis pequeniños ao vagón. E nervios... Había tamén moitos nervios!!! E non era para menos, xa que ademais de ir en tren, fixeron algo moi especial e que poucos medios de transporte nolo permiten, debido sobre todo ao reducido espazo. Pero o tren é máis amplo e concedeulles un desexo que tiñan o grupo de ukeleles e guitarras que ensaia co profe Óscar: TOCAR E CANTAR NO TREN!!! Que canción? Pois claro!!! "O tren" de Andrés do Barro, un exitazo do ano 1969 que esta mañá soou nun traxecto que, aínda que non vai pola beira do Miño, si os levou ao seu destino: Padrón!!! A viaxe fíxoselles curta, pero desfrutárona MOITÍSIMO!!!


E queredes escoitar e ver os vídeos cantando a canción? Aquí os tedes!!!!!





"SOMOS AUTÉNTICOS/AS"

Hoxe celébrase o Día Mundial do Síndrome de Down, e para este ano 2018 a Asociación Down España lanza unha campaña que pretende reflexar a autenticidade das persoas con síndrome de Down, a súa naturalidade e espontaneidade. Co obxectivo de mellorar a súa inclusión social, envíannos unha mensaxe ben fermosa: son auténticos porque non hai quen os imite, son xenuinos, amósanse tal e como son, sen artificios.
 

E eu, que tamén son unha auténtica porquiña, quero compartir con todos vós o vídeo que realizaron para esta ocasión, ademais de recordarvos que na biblioteca tedes un fermoso libro no que o protagonista tamén ten síndrome de Down.


Espero que, tanto o libro como o vídeo, vos gusten moito e vos axuden a comprender mellor ás persoas con síndrome de Down, así como a valoralas e respectalas!!!


martes, 20 de marzo de 2018

"TERÍA QUE SER PATRIMONIO CULTURAL..."

Xa estou de novo aquí!!!!
Agora que sabedes o que é o patrimonio, e que sodes capaces de diferenciar o patrimonio material do inmaterial, xa estades preparados/as para participar na actividade que nos propuxera Nina, a arqueóloga do Concello. Por ese motivo, esta tardiña deixei unha carta nas vosas clases, para animarvos a todos a buscar nas vosas casas, nas vosas aldeas, entre a xentiña da vosa familia, dos veciños e veciñas, etc., aquelo que pensedes debería ser patrimonio cultural. Quen sabe se a vosa candidatura acaba formando parte deses bens materiais ou inmateriais que deberiamos coidar para que duraran o maior tempo posible!!!
Animádevos a participar!!! Seguro que atopamos cousas moi interesantes coas que poderemos realizar unha exposición única...
Aquí vos deixo a cartiña para que non esquezades nada do que nela se di:




sábado, 17 de marzo de 2018

DÍA DA POESÍA 2018

Hoxe, mentras comiades, andiven pasando polo colexio, e deixeivos unha cartiña que creo que vos fixo moita ilusión! Que alegría!!! Pois vouna poñer tamén aquí para que todas as persoas que queiran lela poidan facelo, e se se animan tamén as invito a facer a mesma actividade ca vós...
Unha aperta grande para todas!!!




mércores, 14 de marzo de 2018

AMASANDO BOLOS DO POTE

O luns 26 de febreiro os nenos e nenas de 1º e 2º viaxaron á Picota para coñecer en profundidade o bolo do pote, un prato característico da nosa bisbarra.

"O bolo miúdo", como se chamou a iniciativa, foi organizada polo Taller de Emprego "Proturismo 2017" coa colaboración imprescindible da Asociación de Amas de Casa de Mazaricos.

Nada máis chegar, os nenos e nenas do Víctor Sáenz e de Pino de Val foron recibidos como auténticos reis, con cadansúa coroa! Despois, os estudantes do módulo de Promoción turística do Taller de Emprego encargáronse, con bailes, teatro e xogos, de dar a coñecer os ingredientes e a elaboración deste prato tan antroideiro.

Despois chegou a parte práctica, coa axuda de A. García, E. Muíño e L. Prado, as cociñeiras da Asociación de Amas de Casa de Mazaricos, que son as encargadas de cociñar cada ano -e xan van 20!- na "Festa do Bolo do Pote" de Mazaricos. E, por suposto, a degustación, porque aínda que a elaboración do bolo do pote é unha tradición que forma parte do patrimonio inmaterial da nosa bisbarra, o resultado é ben material. E ben bo que está!

Como engadido, tiveron a visita da TVG, o que lles permitiu coñecer un pouco como se fai un programa de televisión. Ademais de saír guapísimos/as na pantalla, claro está!!!

Premendo AQUÍ podedes ver o vídeo que realizou o Concello de Mazaricos sobre esta actividade.

Se premedes AQUÍ podedes ver as imaxes desa gastronómica xornada.

Tamén a TVG recolleu a noticia no programa "Galicia Viva" retransmitido o 1 de marzo ás 7 da tarde. Premede AQUÍ para velo; a partir do minuto 39, ata o 44, podedes ver aos rapaciños e rapaciñas do noso cole!!!

E no programa "Momentos G", o día 2 de marzo fixeron unha reportaxe sobre a "XX Festa do Bolo do Pote" de Mazaricos, que tamén podedes ver premendo AQUÍ.