FELIZ ANO 2017!!! Xa estamos de volta!!! Alá van varios días onde as rutinas mudan moito do resto do ano: comemos moitas cousas diferentes e moi ricas, deitámonos tarde e durmimos todo o que nos presta, vemos a persoas que viaxan aos nosos fogares durante estas datas, recibimos agasallos enviados por seres que non deixan de sorprendernos... É o que ten o Nadal!!!
Pero agora toca retornar a outra rutina, que tamén é moi fermosa: a de chegar ao cole para ver aos amigos/as, aos profes, viaxar en autobús, ir de excursión..., e aprender un montón de cousas novas. Xogar no patio do cole tamén é unha aventura cada día, emocionarse cada vez que sae a mochila viaxeira, alegrarse coas anécdotas que van sucedendo, saltar de contentos/as cos cumpreanos dos nosos compañeiros/as, dar palmadas polos ricos menús que as nosas cociñeiras nos preparan cada día, etc. Son tantas as cousas que viviremos xuntos, que estou desexando xa vervos en acción.
E eu, que durante as vacacións aproveitei tamén para facer as mesmas cousas ca vós, recibín unha curta dun amigo ao que quero moito, e é tan fermosa que vola traigo hoxe de agasallo para comezar o trimestre!!! Titúlase "Alike", e gañou moitísimos premios, incluso o Goya no 2016 á Mellor Curtametraxe de Animación. Non hai diálogo nela, o único son empregado é unha música composta para a mesma moi bonita. É unha curta para reflexionar; ás veces o mundo semella moi gris: traballar sen descanso, problemas por aquí e por alá, persoas que non poden gozar de moitos dos dereitos que nós, afortunadamente, temos... Pero sempre estamos a tempo de cambiar o rumbo, é cuestión de decidir. Todos queremos unha vida chea de aventuras, de cor, de ilusión... Pois a por ela!!!
Ningún comentario:
Publicar un comentario